Ao longo da mañá de hoxe celebramos a entrada do 2020 nas aulas! Comemos uvas, tivemos cotillón e merendamos até quedar fartos e fartas. Máis tarde, como é tradición, chegaron os bailes. Agardamos que esta festa sirva para que teñades unhas festas moi divertidas e a mellor entrada de ano que se poda ter! Vémonos en xaneiro!

 Hoxe estreamos o programa de entrevistas "Sentamos e Falamos" e tivemos unha convidada moi especial: Mª Jesús Suárez, máis coñecida por todas e todos nós como Susy. Carlos e Nerea preguntáronlle todas as cuestións que saíron nas dúas aulas de 5º e, deste xeito, puidemos coñecer detalles sobre a infancia ou os primeiros anos de docencia da nosa mestra de educación física que, se nada o remedia, hoxe tivo a última sesión con cada unha das clases. Agardamos que disfrute tanto da xubilación como fixo disfrutar ás nenas e nenos de 5º de Primaria ao longo destes anos.

Hoxe foi o derradeiro día dos primeiros obradoiros de plástica. As nenas e nenos traballaron canda Andy Warhol, Luis Seoane e Joan Miró.  Deixamos por aquí algúns exemplos das súas obras e, ademais, un vídeo do estupendo ambiente de traballo que conseguiu a profe Silvia, á que lle estamos moi agradecidas pola súa implicación.

O alumnado de valores sociais e cívicos visualizou a curtametraxe "Vestido nuevo", que deixamos por aquí para que todas e todos a vexades. Ao día seguinte, varios alumnos da clase de 5ºB, decidiron "rachar" con algunha que outra convención social. Moitas grazas pola vosa valentía!

Este mércores celebramos no colexio o Magosto comendo castañas e practicando xogos tradicionais galegos. Ademais, ao longo destes tres últimos días, conmemoramos o Samaín, a festa previa ao Día de Defuntas e Defuntos. Queremos tamén agradecer ás familias a súa contribución coas cabazas!